مش كفايه استفزاز بقى ولا ايه ؟؟
كل ما واحده خلفت لها ولد عملت نفسها
انها عملت اللى ما حدش عمله
ويوم ما تجوزه
تبقى جت واحده خطفته منها
بعد ما حملت وربت وسهرت وتعبت جت واحده اخذته على الجاهز !
على اساس ان اللى جت اخدته دى امها اشترتها جاهزه
من السوبر ماركت
مش هى كمان حملت وولدت وسهرت وربت
وجه واحد اخدها منها على الجاهز
وبالعكس بقى فراق البنت عن بيت اهلها بيكون اصعب واشد
لان البنت طول وقتها فى البيت قدام عيونهم
وبتساعد وبتعين
بس يوم ما بتتجوز بيفرحوا
وبيعرفوا ان دى سنه الحياه
لكن الولد امه متعوده على خروجه وسفره وغيابه عن البيت
يا اما مسافر يتفسح مع اصحابه
او بيدرس او بيشتغل فى بلد تانيه
او لما يدخل الجيش
يعنى ام الولد متعوده
وساكته وراضيه
اشمعنى بقى لما يتجوز بتقيد نارها 
وبتبقى عايزاه متخيط فيها ليل ونهار
وبتفتكر بس ان مراته اخدته
طيب ماهى مراته دى هى اللى بتخدمه
بتآكل وبتشرب وبتغسل وبتنظف وساعات بتشتغل بره البيت عشان تساعد فى المصروف
وبتخلف له عياله وبتربيهم
وبتسهر جمبه فى مرضه
كل ده مش فى الحسابات !!!!
امتى بقى النظره الخايبه للامور دى تتغير
وكل ام تفتكر يوم ما اتجوز ابنها انها زى ما تعبت وربت
فيه ام تانيه برضه تعبت وربت عشان تديله بنتها
عشان الاتنين يكونوا اسره جديده
لان دى سنه الحياه
اللى ربنا خلق عليها الكون
ولو كل واحد اتقى ربنا
الحياه هتبقى كلها بركه
منقول
