التصنيف: القسم الادبي

ونين من رجله غدت تقـل مقـــواس
ويون تالي الليــل يشكي الجبيـــره

وياحمس قلبي حمـس بنٍ بمحمــاس
ويا هشم حالي هشمهـا بالنقيـــره

ويا وجد حالـي يا ملا وجد غــراس
يوم اثمرت واشفا صفا عنه بيـــره

على ثمـر قلبي سرا هجعة النـــاس
متنحــرٍ دربٍ عسا فيــه خيـــره

الله يفكـه من بلا سو الاتعـــــاس
ومن شــر عبثات الليالي يجيـــره

فـي ديرةٍ تقطعـت عنه الأرمـــاس
سبعيــن يوم للركايــب مسيـــره

لا والله الا حال من دونـه اليـــاس
حـط البحر والبر دون الجزيـــره

عقّب لسلوانٍ ورا الصين والطــاس
وقلبــي على فرقاه تسمع فريـــره

يالله ياللي رد من عقـب ما يـــاس
يوسف على يعقوب وابصر نظيـــره

ترد علّي ادباس يا محصـي النــاس
يا عالمٍ ما بالخفــا والسريـــره

يا ادباس انا اوصيك عن درب الادناس
ترى الذي مثلك يناظــر مسيـــره

عـليك بالتقوى ترا العز يا ادبــاس
في طاعة اللي ما ينجيــك غيـــره

هذي ثمان اسنين من رحت يا ادبـاس
لا رسالةٍ جتنــي ولا من بريـــره

يا ادباس من عقبك ترا البال محتـاس
وعليك دمع العيـن حرق نظيـــره

وعليك كني في دجا الليل حـــراس
أصبح على حيلي وعيني سهيـــره

أصبحت أنا ما بين طاري و هوجـاس
وطواريٍّ تطري علينـا كثيـــره

مثل الوحش قلبي على كـفّ حبـاس
يكفـخ كما طيرٍ اسبوقه قصيـــره

متحيرٍ من عيلة البيت يا ادبــاس
ارجي ثواب الله و اخاف المعيـــره

أخاف من حكـي العدا ثم الانــجاس
أهل الحكايا الطايله و القصيـــره

ويقال خلا عيلتــه عنّز الـــراس
اقفــا وخلا عيلــةٍ له اصغيـــره

ولاّ فنــا يا بوك قطاع الارمـــاس
ما نيـب مثبورٍ ورجلـي كسيـــره

أصلــك لو دونك نبا حمر الاطـعاس
الصلب والصمان دروبٍ عسيـــره

مهالكٍ مداركٍ مــا بهـا اونــــاس
إلا الثعل والبوم تسمــع صفيـــره

لـو كنــت في نزوا وديرة بني ياس
أهل الموازي والوجِيــه الغبيـــره

عبّــادة الأصنام شرّابة الكــــاس
الخمــر والتنباك فيهــا وغيـــره

لاركب على وجنـا من الهجن عرماس
فجَّ النّحـر يا ادباس حمرا ظهيـــره

متروسة الفخذيـن مزبورة الـــراس
كن الخلاص اعيونهــا يوم اديـــره

يا شبــه ربدٍ يوم تخفق بالاونـــاس
وان رفعـت جنحانهــا مستذيـــره

تنشر من العوده علــى نور الانـفاس
عند الفجر والليل مقفــي مريـــره

والعصر بالصمان تسمــع لها اضراس
حبل الرسن خطرٍ تبتــر جريـــره

ونـــهار ثالث بين حمـا والأوراس
واره يمينك جعلهــا لك سفيـــره

واركـب على ساجيـةٍ تقلب الــراس
تمشي بهلها في البحـور الغزيـــره

الى مسقط الفيحاء بهـا الخيـر محتاس
لولا الكفر والشــرك ياوي ديـــره

عز الله انهـا ديرةٍ ما لها اجنـــاس
لولا بهـا يعبــد مـع الله غيـــره

لولا بها يشرك علي وعبـــــاس
وأيضاً بها الفاروق سبـه بريـــره

فـيها الطبيخ وراهي الخبـز يا ادباس
يقعد خوي الراس خنــة خميـــره

هي ديرة اللـي باغيٍ كيفة الـــراس
ولا له حدٍ همـه من النـاس غيــره

هيـسٍ ولد هيـسٍ و للصحاف لحـاس
يفرح إلـى نيدي لذبح العقيــــره

ذا ماقـفٍ يا ادباس ما فيـه نومـاس
يصلح لقينٍ مهنته طـق زيــــره

ترى الفداوي دون وانـت أنشد النـاس
راعيه ما يذكـر بخيرٍ وغيــــره

ما له سوى حذو الحنـك منه واليـاس
والى انقطع خرجه فلا له ذخيـــره

طلب المعيشه بالحراثـه والاجنــاس
المشترا والبيع يوصـف وغيـــره

ثـم انهـض العيرات مع كل فــراس
يا ادباس دوّر خيّــرٍ تستشيـــره

جدك وعمانك هـل العزم والبـــاس
أهل اللوازم مكمليــن القصيـــره

يا ادباس ما يصبر على البـق والحاس
إلا الذي مالــه بنجـدٍ عشيـــره

واليوم يا مروى شبـا كل عبـــاس
أنت الرجا يا لطّـام وجيـه المغيـره

عشرين عام كلهـا ارجيك يا ادبـاس
مثل الغرير اللي تولــع ابطيـــره

عدل المناكب هيلعٍ فـرخ قرنــاس
يمناه في لطم الحبــاري شطيــره

عـانق خلوجٍ روحت عقـب مرواس
عند العصيـر لبيضهـا مستذيـــره

والليل جاه وحال من دونهــا اليـاس
روحه على فرقــاه فرت فريــره

يا ادباس أنا يابوك ما نيــب بـلاس
مَيْـر ان عيلات الرفاقــه كثيــره