يكفي دم
ويكفي تجرعنا عذاب و هم
ويكفي زمان وشعبنا إنظلم
ويكفي علي شأن السعاده متنا
يكفي حيره
ويكفي فقدنا ناس كانت خيره
ويكفي معانا طايله هالسيره
ويكفي سنين وسايله دمعتنا
يكفي إبكانا
ويكفي إنسينا ربنا مولانا
ويكفي إغتصبنا ضيفنا ومن جانا
ويكفي خساره ضايعه طيبتنا
يكفي لعب
ويكفي طلعنا شعب طبعه صعب
ويكفي إللي في الأمن تمو رعب
ويكفي كتايب ضيعت فرحتنا
يكفي موت
ويكفي دخل شيطان بين الخوت
ويكفي بكينا لين غاب الصوت
ويكفي إنهارت في الحياة حالتنا
يكفي يأس
ويكفي سلاح ومنتشر ع الناس
ويكفي شربنا من أمرار الكأس
ويكفي عذاب وغايبه ضحكتنا
يكفي خمر
ويكفي شربنا لين ضاع العمر
ويكفي حشيش ولعبنا ع الجمر
ويكفي نسينا خاتمة دنيتنا
يكفي طيش
ويكفي فقدنا من زمان الجيش
ويكفي نقولو كيف صار وليش
ويكفي معانا طايله حيرتنا
يكفي سرقه
ويكفي خواطر م الزعل منحرقه
ويكفي معانا نار تنزل ترقا
ويكفي إنكسرت م الشقا شوكتنا
يكفي لوع
ويكفي ذرفنا من زمان إدموع
ويكفي نفسنا في الحياة مقطوع
ويكفي إسنين وذاهبه شيرتنا
يكفي فلوس
ويكفي ملينا جيبنا المنحوس
ويكفي تجارب ما خذينا دروس
ويكفي زمان وكاثره سرقتنا
التصنيفات
