القلب يحزن والمدامع غزيره… في جوفي نارًا من لهبها تباكيــت
والدار ظلمة كانت أمي تنيره….. يا يمه وينك من دونك خلا البيت
قلبي تفطر على الفرقة المريره….. آمنـــت بالله وبأقداره تـراضيــت
الموت حقاً وكلاً له مصيره ….. وموت النبي قبلك يايمه تعـزيــت
هذا جلالك وريحك في عبيره….. كل يوم اشمه واذا شفته تهنيت
صوتك يا يمه يا محلا أثيره ….. وحنــانك يايمه يخليـني تدفــيت
يا يمه من هو أجيله واستشيره….. يعدلني اذا شفت الصواب وتنحيت
يوم كنتي عندي وكني أمير ديره….. وكل يناديني يقولي تغليت
يوم رحتي يمه وكأني في جزيره…..وحيداً فيها وعن الناس تواريت
اجيها و ياخف وقت الظهيره….. محدا سأل عني يقول تغديت
وأبيت ليلي وعيوني سهيره….. وكم الليالي نايما ما تعشيت
ظروف يا يمه تواجهني عسيره….. الشكوى لله بظروفي تعنيت
يا كم تعلمت من معاني غزيره ….. يا منهل التعليم منك تربيت
كم قصةً قلتي للماضي نسيره….. ولا جيت عندك سواليفك تسليت
آه يايمه النظرات الأخيره ….. مليــت كفــي تراب ثم حديــت
أبشري يا يمه بدعوات كثيره ….. كل ما ذكرتك وللرحمن صليت
اللهم أطل في عمر أمي ,
وأرحم من مات من أمهات المسلمين ,
